Опожарена е викенд-куќата на координаторот на Општинскиот комитет на ВМРО-ДПМНЕ од Прилеп Петар Ристески во месноста Кула во околината на Прилеп.
Пожарот избил синоќа околу 22:30 часот. Ристески се сомнева дека пожарот бил подметнат од некој на кој му пречи неговиот политички ангажман.
„ За пожарот бев информиран од противпожарната единица синоќа околу 23.30 часот. Опожарена е целата куќа во која немаше електрична енергија, ниту електрични апарати, па сум убеден дека пожарот е подметнат. Единствено што ми паѓа напамет е дека е политички мотивиран. На некого му пречи политичкиот ангажман и активноста на Петар Ристески. Повикувам на разум зашто работите одат предалеку, рече Ристески.
Градоначалникот на Прилеп Илија Јовановски ги повика сите надлежни институции да го расветлат случајот и да ги откријат причините за пожарот.
„Личната и безбедноста на имотот на политичарите, од која било политичка провиниенција, на сите граѓани е императив во едно демократско општество, кон коешто се стремиме“, вели Јовановски.
Од општинската организација на СДСМ го повикаа Ристески да не ги обвинува политичките противници.
„ Наместо да го вперува прстот во СДСМ, надевајќи се дека ќе заработи ситни дневно политички поени, нека погледне во сопствените редови и нека расчисти со внатрепартиските натпревари за позиции. Методите на закани, притисок, уцени, закани по безбедноста на граѓаните и нивниот имот, никогаш не биле поддржани од СДСМ и нашите членови. Таквите методи останаа запамтени во колективната мерморија на граѓаните како симбол на деструктивното, криминално и корумпирано владеење на Груевски и ВМРО-ДПМНЕ во изминативе 12 години, пишува во соопштението на ОО на СДСМ.