Во Париз денеска започна самитот за климатски промени каде глобалните лидери расправаат за инвестирање и финансирање на проекти за борбата против глобалното затоплување, пренесе АП.
Самитот наречен „Една планета“ го отвори премиерот на Фиџи, Френк Баинимарама кој рече дека треба да се поедностави надгледувањето на технологијата за следење на климатските промени, додека шефот на француската дипломатија Жан-Ив Ле Дриан, рече дека целта на самитот е вложување дополнителни напори за намалување на емисиите на штетните гасови со ефект на стаклена градина.
Иницијативата за собирот е на францускиот претседател Емануел Макрон, откако Америка се повлече од меѓународниот договор за глобално затоплување, кој пред две години беше усвоен исто така во Париз.
На средбата, меѓу другите се претседателот на Мексико Енрике Пења Нието, мароканскиот крал Мухамед Шести, како и претседатели на африканските земји и острови кои се загрозени од климатските промени.
Претседателот на Европската комисија Жанк Клод Јункер и генералниот секретар на Обединетите нации Антонио Гутереш се исто така на самитот.
Стотици активисти за заштита на животната средина се собрани пред зградата во која се одржува собирот.