Со присуство на стотици луѓе, музика којашто ечи од подвижна бина, со знаменца и транспаренти, меѓу кои се виори и пораката  „Доста е криење“, денеска напладне започна втората Парада на гордоста во Скопје, која треба да заврши попладнево во Градскиот парк.

Граѓани уште од 10 часот се собраа во паркот „Жена борец“, каде ги земаа алките за влез на парадата. Националната мрежа против хомофобија и трансфобија е организатор и на втората Парада на гордоста.

Првата парада во Скопје се одржа во 2019 година,  а во минатата година оваа манифестација не беше одржана поради епидемијата на Ковид-19.

Премиерот Зоран Заев преку својот Фејсбук профил вчера и даде поддршка на ЛГБТИ заедницата.

Денеска во Битола ќе се одржи контра-Парада на гордоста, исто како и во 2019 година.

– Поради одржување на Парада на гордоста од 12 до 17 часот,  во центарот на Скопје денеска ќе има изменет режим на сообраќај на улиците „Димитрије Чуповски“ и „Даме Груев“, како и дел од булеварите „ВМРО“ и „Илинден“ ,  информираа од МВР.