Лицата позитивни на ковид-19 коиштo не се осигурени по ниту еден основ наскоро и електронски ќе може да се пријават како осигуреници во Фондот за здравствено осигурување на РС Македонија, дознава НоваТВ.
Одлуката е стокмена, се чека да биде усвоена на првата седница на Управниот одбор на ФЗОМ.
– Подготвивме одлука со која ќе има измени во делот на пријавување за здравствено осигурување со којашто ќе биде овозможено електронско пријавување од страна на осигуреникот со скенирање на потребна документација и праќање на меил. Адресата на електронската пошта многу скоро ќе биде јавно објавена на веб страната на Фондот за здравствено осигурување. Одлуката за пријава на болните од ковид -19 е подготвена, треба уште да помине на првата наредна седница на Управниот одбор на ФЗОМ, изјави за НоваТВ Ирфан Лимани, директор на Секторот за комуникација и административна поддршка во Фондот за здравствено осигурување на РСМ.
Новата мерка е со наслов: „ Остварување на право на електронско пријавување во задолжително здравстено осигурување на државјани на Република Северна Македонија кои се лекуваат од Коронавирусот ( COVID-19) во државата и кои не се осигурени по ниту еден основ“, и е дополнение на Одлуката за утврдување на мерки за заштита на осигурените лица и на другите учесници во постапката при остварување на правата од задолжително здравствено осигурување во време на изречена мерка за спречување на ширењето и сузбивање на заразни болести од надлежните институции.
Скопјанка која во петокот дознала дека е позитивна на ковид-19 раскажува дека од 1 септември е без здравствено осигурување, а бидејќи е дома во изолација, не може да оди и лично да се пријави во подрачната единица на ФЗОМ во Скопје.
– Ме облеа „студен туш “ кога матичната докторка ми кажа дека немам осигурување кога сакав да закажам ковид тест и испитување на Д-димери и други крвни анализи. Што ако во меѓувреме ми затреба и некоја друга здравствена услуга, ќе треба ли од својот џеб приватно да си ја платам? На 1 септември годинава ми заврши работниот однос, се пријавив во Агенција за вработување од каде чекам решение. Не очекував веднаш да останам без здравствено осигурување, мислам дека порано тоа траеше уште еден месец откако некој ќе остане без работа – реагира 60-годишната М.Т.
Од Фондот за здравствено осигурување потсетуваат дека и осигурениците кои немаат здравствено осигурување, а се заболени од ковид-19, со Одлука на Влада имаат право на здравствени услуги бидејќи е во прашање заразна болест.
(Љ.Б.)