Лондонската „О2 арена“ ќе биде домаќин на завршниот АТП Мастерс уште оваа и наредната сезона. Турнирот што од 2009 година се игра во англиската престолнина и кој за секое издание привлекуваше околу 250.000 гледачи потоа се сели во салата „Пала Алпитур“ во Торино.
Објектот се користеше за време на зимските олимписки игри во 2006 година, а во неа се одигра и завршницата на ланското Светско првенство во одбојка за мажи. Салата ја користеше и кошаркарската екипа на Торино и има капацитет од 12.350 седишта. Според договорот, Торино ќе биде домаќин на завршниот Мастерс најмалку пет години.
Покрај италијанскиот кандидат, за домаќини на престижниот турнир на најдобрите осум тенисер во сезона, но и на најдобрите осум машки двојки, беа заинтересирани и Лондон, Манчестер, Токио и Сингапур.
Завршниот Мастерс најдолго се задржа во „Медисон Сквер Гарден“ во Њујорк каде најдобрите тенисери играа од 1977 до 1989 година.