Завршен е новиот паркинг во Клиничкиот центар „Мајка Тереза“ во Скопје што се наоѓа на местото на поранешната Клиника за гинекологија. Направен е посебен влез за возила на итната медицинска помош до Ургентниот центар на хирургија, направени се повеќе нови улици што ги спојуваат веќе постојните и се работи на уште неколку нови влезови во кампусот, а како што најави министерот за здравство Венко Филипче, ќе се прави и уште еден паркинг кај Инфективната клиника.

Министерот и градоначалникот на Град Скопје, Петре Шилегов денеска извршија увид во градешните работи во Клиничкиот центар, истакнувајќи дека станува збор за важни инфраструктурни потфати кои ќе го олеснат движењето во Клиниката.

„По повеќе од 50 години сега имаме посебен влез за возила на итната медицинска помош до ургентниот центар на хирургија, нов паркинг до зградата на Гинеколошката клиника, повеќе нови улички што ги спојуваат веќе постојните со што очекуваме да се растовари хаосот што беше тука, истовремено да се растовари и хаосот на улицата „Водњанска“. Дополнително на сето ова, многу е полесно движењето на пациентите низ кампусот, полесно движење на интерклиничкото возило и посебни патеки за движење на пациентите кои се движат со колички, било да се тоа седечки или лежечки. Дополнително се работи уште на неколку влезови и излези, а ќе се прави уште еден паркинг кај Инфективната клиника околу мобилната болница, наведе Филипче.

Тој оцени дека со инфраструктурниот зафат целосно ќе ја смени сликата и ќе се олесни функционирањето на Клиничкиот центар.