Вчера во 21 часот официјално заврши блокадата на зградата на РТС која траеше точно 22 часа. Студентите вечерта во шатори ја минаа пред јавниот сервис, а имаше и инциденти со полицијата.
Утринава работниот ден во РТС се одвива нормално, пред влезот е расчистено, останати се само плакатите со имињата на 15 жртви кои загинаа при уривањето на настрешницата на железничката станица во Нови Сад.
Сега српските студенти се спремаат за големиот протест на 15 март во Белград. Од цела Србија нивните колеги се тргнати пеш за да стигнат на датумот.
View this post on Instagram
Претседателот на државата, Александар Вучиќ, за тој ден предвидува големо насилство и најавува апсења, но од ЕУ порачуваат дека темелните вредности „се во сржта на нашиот заеднички европски проект и треба да се почитуваат“.
Претставниците на ЕУ потврдуваат дека внимателно ја следат актуелната внатрешно-политичка ситуација во Србија и големата мобилизација на студенти и други групи, пишува Радио Слободна Европа.
Запрашани да ги коментираат наводите на претседателот Вучиќ дека Западот стои зад „обоената револуција“, како што ја нарекува мобилизацијата на студентите и граѓаните во Србија, претставниците на ЕУ потсетуваат дека „на дезинформациите и политичката реторика, вклучително и против ЕУ и земјите-членки, немаат место на патот кон интеграција во ЕУ“.
А, веќе неколку дена пред српското претседателство со шатори престојуваат група студенти кои се нарекуваат „Студенти 2.0“. Околу паркот е подигната и ограда поради што е невозможно да се дојде до нив. Тие бараат прекин на блокадата и продолжување на наставата на факултетите, во средните и основините училишта. „Книги, браќа мои, книги, а не пленуми и транспаренти“, пишува на нивниот транспарент.