Пред половина час заврши распитот на скопскиот бизнисмен Љупчо Палевски – Палчо во Специјалното јавно обвинителство. По неколкучасовно испрашување, СЈО за Палевски не побарало притвор. Кои се причините за ова од Специјалното обвинителство вечерва не се достапни за коментар.
Палевски синоќа беше приведен на барање на Специјалното јавно обвинителство и однесен во полициска станица каде беше задржан 20 часа, а потоа беше префрлен во СЈО.
Според неофицијални информации Палевски е приведен поради тоа што е осомничен дека е инволиран во објавување на прислушувани приватни разговори на јавни личности, меѓу кои новинари и бизнисмени. На „Јутјуб“ сè уште стојат неколку приватни разговори објавени од корисникот „Никола Тесла“. На разговорите се слушаа гласовите на новинарите Оливера Трајковска, Драган Павловиќ Латас, Ивона Талеска, политичарите Али Ахмети, Муса Џафери, Ермира Мехмети и Мендух Тачи, но и на бизнисменот Јордан Камчев.
Со налог од судија на претходна постапка извршен е претрес во објекти и во работилницата на Палевски, но ниту истражните органи, ниту неговиот адвокат не откриваат дали полицијата пронашла нешто.
Уредникот на телевизија „Сител“, Драган Павловиќ – Латас во СЈО пријави вакви злоупотреби и побара истрага за изворот кој ги пушта разговорите во јавност. Во април минатата година СЈО објави дека отвориле предистражна постапка за објавените приватни разговори.
На приведувањето на Палевски денеска реагираше ВМРО-ДПМНЕ. Тие велат дека Јанева нема мандат да отвора нови истраги и доколку има случај со Палевски по него треба да постапува Основното јавно обвинителство.
„ВМРО-ДПМНЕ смета дека секој што се огрешил пред законот и работел во спротивност со истиот, треба да одговара за своите дејствија во законска, фер и правична постапка и никако поинаку. Доколку Палевски го прекршил законот, тој за тоа треба да одговара пред ОЈО кое е единствено легитимно и надлежно обвинителство да отвора истраги и покренува обвиненија без било какви пречки“, рече Орце Ѓорѓиевски – ВМРО-ДПМНЕ.
Според Кривичниот законик за објавувањето на приватни материјали предвидена е затворска казна од 1 до 5 години.