Бразил е нов фудбалски шампион на Јужна Америка. По пауза од 12 години, „кариоките“ успеаја да го подигнат континенталниот трофеј по победата во финалето на Копа Америка над Перу со 3:1. Стрелци за бразилската селекција на култниот стадион „Маракана“ во Рио беа Евертон во 15. минута, Габриел Жезус во екстра времето на првиот дел и Ришарлисон од пенал во 90. минута. Почесниот за цврстите Перуанци беше дело на Гвереро од белата точка во 44. минута. Аргентина го освои бронзениот медал по победата над Чиле во малото финале со 2:1.

Бразил во последните 20 минути од финалето беше со фудбалер помалку на тревникот по исклучувањето на Габриел Жезус. Но, не само што успеа да ја одбрани предноста од еден гол туку и го запечати триумфот за деветти трофеј на Копа Америка, петти на домашен терен во исто толку организации на првенствата на Јужна Америка.

https://www.youtube.com/watch?v=VDswyR5EYoY

Шампионскиот пехар му беше врачен на капитенот Дани Алвеш, официјално прогласен за најдобар играч на годинашното издание на турнирот кој воедно е најтрофеен фудбалер на светот со 40 титули. Признанието за најдобар во финалето го понесе Евертон кој беше стрелец на првиот гол и изнуди пенал за својот тим. Членот на Гремио, исто така, заврши и како прв стрелец на првенството со три гола колку што постигна и Гвереро. Индивидуална награда доби и голманот Алисон Бекер кој прими само еден гол во шесте настапи на Копа Америка 2019.

Перуанците, од друга страна, го поправија впечатокот по убедливиот пораз од Бразилците со 0:5 во групната фаза. Во финалето добро се држеа, долго време заостануваа само за гол, на моменти имаа шанси и за 2:2. По 44 години повторно заиграа за престижната титула на Копа Америка, откако во четврт-финалето го елиминираа Уругвај, по подобро изведување на пенали, а во полуфиналето и Чиле и завршија како најпријатно изненадување на шампионатот.

Наредното јужноамериканско фудбалско првенство е догодина од 12 јуни до 12 јули во коорганизација на Аргентина и на Колумбија.