Загрижени заради незаинтересираноста на владите во однос на финансирање за превенција и лекување на ХИВ, владини и невладини претставници од осум земји од регионот денеска на Регионален состанок во Скопје, бараат начин за изнајдување на одржлив одговор на ХИВ.
Доколку не се смени политиката и не се изнајдат начини за финансирање по заминување на Глобалниот фонд земјите ќе се соочат со големи човечки жртви. Од сите земји Глобалниот Фонд останува да финансира само во Албанија и Косово. Македонија и БИХ се соочуваат со недостиг на финансиски средства,а Бугарија и Романија немаат посебен буџет за ХИВ, туку се во склоп на целокупниот буџет во здравството.
„Владите треба да ги зголемат финансиите и треба да биде јасно дека доколку не се реши овој проблем, сето тоа ќе не чини многу човеки животи“, изјави Аида Куртовиќ , заменик-претседавач на Управниот одбор на Глобалниот фонд за борба против ХИВ.
Околу 50 претставниците на Националните координативни механизми од земјите учесници, Македонија, Бугарија, Србија, Косово, Албанија, Романија, Босна и Херцеговина, Црна Гора и Романија денес и утре бараат заеднички и координиран одговор што ќе може успешно да одговори на предизвиците кои се пред најголем дел од земјите, во моменти кога голем дел од владите не обезбедуваат доволно средства за одржување на превентивните програми. Македонија како една од најзасегнатите земји, каде што буџетот е повеќе од преполовен по заминување на Глобалниот фонд, не испрати свој претставник на високо ниво кој би одговорил на суштинските прашања во делот на финансирањето. Затоа организаторите на конференцијата побараа од идната влада итно да го коригира усвоениот буџет за нерданата година.
„ Бараме идната Влада итно да го коригира буџетот и Програмата за ХИВ, како и стабилни механизми за превенција со кои ќе се спречат смртни случаи, изјави Андреј Сених, извршен директор на здружението за поддршка на луѓето со ХИВ.
Тој нагласи дека скратениот буџетот од 65 на 27 милиони денари може да се одрази и на недостиг на терапија за болните без разлика што во моментот се врши набавка на лековите како и на бесплатните ХИВ тестирања. Не се знае до кога ќе траат залихите, нагласи Сених.