Земјотрес во Валандово – 3.3 степени по Рихтер

Земјотрес со јачина од 3,3 степени според Рихтерова локална магнитуда е почувствуван утрово во Валандово и околината, соопшти Сеизмолошката опсерваторија при Природно-математичкиот факултет во Скопје.

Телеметриската сеизмолошка мрежа на Република Северна Македонија, на сеизмолошките станици инсталирани ширум територијата на државата, одржувани од Сеизмолошката опсерваторија, го регистрирала земјотресот утринава во 5 часот и 54 минути чиј епицентар потекнува од епицентралното подрачје Валандово, 120 км југоисточно од Скопје.

Според податоците со кои располага Опсерваторијата, земјотресот е почувствуван во Валандово и околината со интензитет од 4 степени според Европската макросеизмичка скала.