По 5 години постоење згасна контроверзното здружение „Институт Павел Шатев“ – Скопје. Одлуката за бришење е донесена од Собранието на здружението на 2 март, а денеска и официјално е избришано од Централниот регистар.
Овој институт беше основан во 2012 година на истата адреса на која живее претседателот на здружението, Ивана Петровска. Дел од основачите имаа високи функции во државни институции.
Гордана Симоноска беше раководител на правната служба во Македонска Пошта, а како основач беше и Златко Јанковски, екс портпарол на Секретаријатот за европски прашања.
Институтот „Павел Шатев“ редовно лиферуваше предизборни анкети за убедливо водство на ВМРО-ДПМНЕ пред СДСМ.
Последната анкета што ја објави „Павел Шатев“ беше пред последните избори во декември 2016 година, кога уверуваа дека за ВМРО-ДПМНЕ ќе гласаат 27,8 проценти од испитаниците, а 16,2 отсто за СДСМ.
Институтот освен анкети за рејтинзи, организираше и трибини и работилници, а гости беа од екс премиерот Никола Груевски до министри и директори на државни институции од ВМРО-ДПМНЕ.
Медиумите во текот на 5-те години постоење на „Павел Шатев“ се обидоа да му влезат во трагата на ова здружение, но на официјалната адреса во скопската населба Чаир никогаш немаше никој.
За петте години функционирање, „Павел Шатев“ немаше своја интернет страна, освен Фејсбук група на која објавуваше информации и фотографии од своите активности.
Јавна тајна е дека ова здружение, како и невладината со иста намена „Димитрие Чуповски“, беа формирани од ВМРО-ДПМНЕ со цел да создаваат анкети за голема предност на партијата, а потоа преку провладините медиуми кај јавноста да се создаде впечаток дека ВМРО-ДПМНЕ е непобедлива.
Згаснувањето на „Павел Шатев“ се случува во време кога никнуваат нови патриотски здруженија кои ќе се залагале за подигнување на националната свест на Македонскиот народ, зачувување на унитарноста, идентитетот и јазикот на државата. Како што објави НОВА ТВ, Само во последната недела се формираа здруженијата: „МПО Лавови Битола“, „Национален фронт“- Прилеп, фондацијата „Македонско наследство Тодор Александров“, а денеска во Централниот регистар беше заведена и невладината „Непокор“ од Струга.