Останувам скандализиран од фактот што Романија сè уште не влезе во Шенген. Ова го изјави во Букурешт поранешниот претседател на Европската комисија Жан-Клод Јункер, кој е во посета на Романија.
Тој коментира дека има очекувања кои не се исполнети од оние што ја предводат Европската унија и го критикуваше фактот дека Романија се уште не е дел од зоната без граници.
Јункер потсети дека се залагал за пристапување на Романија во Шенген уште во 2014 година, кога стана претседател на Комисијата, и додаде дека оттогаш не престанал да ја брани нејзината кауза.
„Вашиот сосед, Украина, беше нападнат против сите правила на меѓународното право од страна на Руската Федерација, а вие сте непосредни соседи на земјите од Западен Балкан кои сакаат да станат членки на Европската унија. Кога ќе дојде тој ден, Европа ќе биде целосна“, изјави поранешниот претседател на Европската комисија, цитиран од Диги24 и БТА.
На церемонијата во Букурешт тој ја доби титулата „Doctor honoris causa“ од Академијата за економски студии.