Борусија Дортмунд и Легија Варшава уриваа рекорди во Лигата на шампиони во вторникот, Лионел Меси во средата, Македонија во вчера претпладне се спушти за нови седум места на ранг листата на ФИФА, вечерта Интер се избламира во Лига Европа. Ова, воглавно, беа насловите што ја одбележаа оваа работна седмица на фудбалски план. Топ веста, сепак, дојде од Англија. Стивен Жерар ги закачи копачките на клин и објави крај на богатата кариера.
Ликот на Стивен Жерар ќе остане нераскинливо врзан за Ливерпул. Играчот од средниот ред на „црвените“ што себеси, примарно, се опишува како деструктор на противничката игра е трајно врежан во срцата на фановите. Особено слаба точка е на „Коп“, светски познатиот дел од трибина на фудбалскиот објект во градот на „Битлси“ што ги обединува најверните следбеници кои безрезервно ја ценеа, ценат и ќе ја ценат секоја капка пот што се браздеше по неговото лице и тело во текот на 17 години.
You will never walk alone
Инспирирани од тимската химна чии стихови „грмат“ на мечевите на „Енфилд Роуд“, навивачите му порачаа „You will never walk alone“ преку социјалните мрежи и разноразните фан страници на интернет и негови лични и на клубот. Меѓу нив има статус на икона и неговите партии, асистенции и голови ќе бидат споменувани како и епското финале во Лигата на шампиони против Милан во Истанбул во 2005 година.
„Жерар, за мене, е еден од најдобрите играчи на неговата позиција. Тој има неверојатно големо влијание на теренот“, рече Роналдињо за Жерар во 2007 година кога двајцата беа номинирани за фудбалер на годината на ФИФА.
Фудбал почна да игра на деветгодишна возраст во Вистон Џуниорс во Мерсејсајд и набрзо се најде во радарот на скаутите на Ливерпул и се пресели во нивната Академија. Првиот професионален договор го потпиша на 5 ноември во 1997 година, за сениорската екипа дебитира една година подоцна. На клупски план освои три титули во англискиот Лига куп, две во ФА купот и по една во Лигата на шампиони, во Купот на УЕФА и во европскиот Суперкуп. Неисполнета желба остана тронот во Премиерлигата. Од 2007 година е во брак со Алекс Кјуран, англиски модел и моден колумнист на „Дејли Мирор“, со која има три ќерки.
Eдинствен стрелец во финални мечеви во Лига Купот, во ФА купот, во ЛШ и во Купот на УЕФА
Првиот настап за националниот тим го забележа во 2000 година и оттогаш настапи на три европски првенства (2000, 2004 и во 2012 година) и на три светски (2006, 2010, 2014 година). Со 114 репрезентативни настапи е четврти англиски фудбалер по Питер Шилтон (125), Вејн Руни (117) и Дејвид Бекам (115). Многумина го сметаат за најдобар во неговата генерација и единствен е што успеал да биде стрелец во финалните мечеви во Лига Купот, во ФА купот, во ЛШ и во Купот на УЕФА.
„Дали тој е најдобар во светот? – Можеби не привлекувал медиско влијание како Меси и Роналдо, но јас сепак мислам дека би можел да е најдобар. Одличен е во додавањата, може да се справи со секој проблем, да одземе топка, да постигне гол. Но, најважно е што влева верба и поттикнува самодоверба меѓу играчите околу себе. Тоа не се учи, такви фудбалери се раѓаат“, е описот на Зинедин Зидан за Жерар од 2009 година.
Жерар, како активен фудбалер, важеше за универзалец. Најчесто беше употребуван на централната позиција во средина на теренот, а имал улоги и како втор напаѓач, офанзивен играч за врска, последен играч за врска, десен бек и десно крило. Низ годините, сепак, најмногу се востанови во средниот ред, во и околу кругот на теренот и квалитативно најмногу еволуираше и подеднакво добро одговараше на обврски во двата правца (одбрана и напад). Под водство на Рафаел Бенитез имаше улога на поддршка и на креативец на играта. Иако десната е негова посилна нога, тој знаше одлично да ја користи и левата и за асистенции и за голови.
Автобиографии посветени на негов братучед што почина во познатата трагедија на Хилсборо
Како одминуваа годините се профилира во фудалер чии најсилни карактеристики беа визија, прецизни проигрувања на различна оддалеченост, напад со топка, креирање на темпо на игра на својата екипа и асистенции за гол од пристојна дистанца за напаѓачите. Технички одлично поткован, добар во воздушните дуели, со забележителни дефанзивни атрибути, интелигентен со способност за „читање“ на ривалот.
За време на својата кариера Жерар издаде две автобиографски книги, првата објавена во 2006 година, втората во 2015 година. Заедничко за двете е што завршуваат со „Јас играм за Џон Пол“, братучед на популарниот„Стиви Џи“, кој го смртно настрада во 1989 година во познатата трагедија на Хилсборо и со своите десет години беше најмлада жртва во вкупно 96 човечки загуби.
Стрелец против Македонија во Саутемптон и против Работнички на „Енфилд“
Во мноштвото настапи и голови во кариерата на клупски и репрезентативен план, Жерар има и против Македонија за Англија и против Работнички за Ливерпул. Со волеј го постигна израмнувачкиот гол за Гордиот Албион во 36 минута во ремито (2:2) со „црвено-жолтите“ на „Сент Мери“ во Саутемптон октомври во 202 година во квалификациите за ЕП 2004. Осум години подоцна (5 август 2010 година), реализира пенал за „црвените“ против Работнички на „Енфилд“ во квалификациите за Лига Европа.