Непосредно пред полноќ, кога истекуваше рокот за предавање на потписите за независни кандидатури за градоначалници и советници, Андреј Жерновски во Државната изборна комисија ја предал кандидатурата за градоначалник за општина Центар.
Во ДИК со потребниот број потписи вчера биле примени 27 кандидатури за градоначалници и 47 кандидати за носители на советнички листи низ Македонија.
Жерновски на претходните локални избори во 2013 година победи како кандидат на коалицијата на чело со СДСМ.
Тој вчера до последен момент чекаше на одлука во владејачката партија. Жерновски пред два дена одлучи да собира потписи за независна градоначалничка кандидатура во Центар.
-Имаме заеднички политички противник, а тоа е ВМРО-ДПМНЕ. Верувам дека само со заеднички сили можеме силно да го поразиме.Тоа е поважно од сѐ останато, напиша Жерновски пред два дена на Фејсбук.
Потписи за независна кандидатура собрале и актуелниот градоначалник на Могила Стево Пивковски, Кирчо Ташков и Јорго Огненовски за Битола, Горан Китевски и Стевче Стевовски за Охрид, Тони Ѓуровски за Гази Баба, Борис Давидов за Кавадарци, Маријанчо Анделовки за Куманово, Насто Палиоски за Струга…
Рокот за поднесување на кандидатурите за политичките партии и коалициите е 14 септември.