Актуелниот градоначалник на скопската општина Центар Андреј Жерновски денеска ги отфрли шпекулациите дека тој на претстојните локални избори како независен кандидат ќе има има и поддршката од ВМРО ДПМНЕ.
-Имаме заеднички политички противник, а тоа е ВМРО-ДПМНЕ. Верувам дека само со заеднички сили можеме силно да го поразиме. Тоа е поважно од се останато, напиша денеска на Фејсбук Жерновски.
Вчера тој ги собрал законски потребните потписи на избирачи за повторно да се кандидира за прв човек на оваа скопска општина како независен кандидат и да не ја чека одлуката на СДСМ која може да биде и во корист на неговата кандидатура.
СДСМ се уште не се изјасни кој ќе биде нивниот кандидат за градоначалник на Центар но се шпекулира дека тоа би можел да биде Саша Богдановиќ, претседател на СДСМ од Општина Центар.
Според последните анкети на јавното мислење, Жерновски има поддршка од повеќе од 50 отсто од избирачите и неговиот рејтинг е повеќе од двојно повисок од рејтинзите на потенцијалните противкандидати.
Независните кандидати имаат рок до понеделник да поднесат потписи за кандидатура.