Жестоки судири избија меѓу демонстрантите и полицијата во главниот град на Грузија, Тбилиси, во вторникот, додека парламентот на земјата продолжи со расправата за контроверзниот нацрт-закон за „странски агенти“, критикуван од западните и домашните противници како авторитарен и инспириран од Русија.
Како што пренесува Си-ен-ен, Нацрт-законот, кој критичарите го нарекоа „руски закон“ поради паралелите со законодавството што го користи Кремљ за сузбивање на несогласувањето, повторно беше воведен за дебата од владејачката партија Грузиски сон, откако беше отфрлен минатата година поради бранот протести.
Законодавството, кое ќе бара од организациите кои прифаќаат средства од странство да се регистрираат како странски агенти или ќе се соочат со парични казни, беше критикуван од западните земји, вклучително и САД и Велика Британија, а групите за човекови права го гледаат како обид за намалување на основните слободи во земјата.
Како што пренесува ОЦ Медиа, протестите против законот за странски агенти на Грузија треба да продолжат и денес откако полицијата ги претепа и насилно ги растера демонстрантите и новинарите кои се собраа пред грузискиот парламент во вторникот вечерта.
Првата расправа за законот ќе продолжи во парламентот од пладне, откако пратениците не успеаја да гласаат за законот во услови на жестока дискусија.
На новинарите на онлајн медиумите нема да им биде дозволено да известуваат за настаните во грузискиот парламент трет ден, бидејќи продолжува првото сослушување на законот за странски агенти. Официјалната причина за ограничувањето останува обезбедувањето безбедна работна средина во парламентот.
Според најновото ажурирање, најмалку еден автобус на полицијата за немири бил виден како се движи кон парламентот утринава од страна на ОЦ Медиа.
Драган Мишев / Цивил Медиа