Според правниот застапник на Студентскиот парламент на УКИМ (СПУКМ), Иван Живковски, реакциите на Студентскиот пленум за изземање на претседателката на Комисијата за измена на Статутот за студентско организирање, професорката Родна Живковска, се обид за шиканирање во јавноста и апсолутно нема никаков непотизам во нејзините предлози кога се работи за СПУКМ.
– Каков став има мојата мајка која е избрана од Универзитетскиот Сенат да биде претседател на Комисијата за измена на Статутот за студентско организирање, и она што го предлага, е сигурно во законските рамки. А тоа што јас сум ги застапувал Студентскиот парламент е сосема друга работа и едното со другото не е поврзано. За тоа што Студентскиот пленум се обидува некого да дискредитира и да им наруши рејтинг и авторитет, ќе добијат соодветни пријави од мене и со нив ќе се видиме во судските инстанци, вели Живковски во изјава за НОВА.
Неговата реакција следи откако Студентскиот пленум денеска побара од Сенатот и Ректорот изземање на професорката Живковска поради конфликт на интереси, со цел Комисијата да продолжи непречено со работа.
– Сметаме дека професорката Родна Живковска не може да работи непристрасно, имајќи го предвид досегашното криминално работење на СПУКМ со фалсификување на потписи, неконтролирано трошење, но уште повеќе и насилните избори кои се случија пред очите на целата јавност, а во што е вмешан и нејзиниот син, вели Пленумот во своето соопштение.
За Живковски ова е апсурдно тврдење на помала група која и во минатото се обидувала да ги наруши изборните процеси на УКИМ.
– Апсолутно нема никаков конфликт на интереси, зарем мајка ми треба да ги знае сите мои клиенти и кого јас застапувам. Каква поврзаност има тоа што универзитетски професор кој што е сенатор избран од Универзитетскиот сенат и се води по закон? Тоа е нејзино мислење. Сенатот е тој кој ќе ги прифати или нема да ги прифати нејзините мислења. Тоа што една мала група се обидува да шиканира во јавноста, како што кажав, ќе си добијат пријави и ќе си одговараат по закон. Непотизам овде не постои, порачува Живковски.
Одговарајќи на прашањето на НОВА, за тоа дали смета дека последните избори за нов претседател на СПУКМ беа регуларни, поранешниот претседател на оваа студентска организација, вели, оваа мала група на студенти се обидела да го наруши изборниот процес и во минатото.
– Не ги следев последните студентски избори многу, но од она што го видов по медиумите, имаше мала група на студенти кои сакаа да го уништат изборниот процес, исто како што сакаа да го уништат изборниот процес за избор на ректор. Но со оглед на тоа шо над три години сум надвор од студентското движење, тотално е небитен мојот коментар, потенцира Иван Живковски.
На 30.јуни, изборите за нов студентски лидер се одвиваа во тензична атмосфера, кога студентите гласаа на импровизиран гласачки пулт, на ливче кое наликуваше на флаер, без печат и без регистарсти број.
Иако Студентскиот пленум апелираше за повторување на изборниот процес, и протестираше пред просториите на СПУКМ, кога беа и насилно исфрлeни од страна на Единицата за брзо распоредување, новоизбраниот претседател Давор Поповски за НОВА рече дека тој е регуларно избран и дека му претстоеле сериозна и макотрпна работа.