Амфибиско возило со американски маринци и 15 членови на екипажот потона во водите на Пацификот, во близина на брегот на јужна Калифорнија.
Агенцијата „Асошиејтед Прес“ известува за најмалку една жртва во инцидентот и дека најмалку осум лица се водат како исчезнати. Двајца маринци се спасени и хоспитализирани со тешки повреди, а еден од нив е во критична состојба и се бори за живот.
Во потрагата по преостанатите членови на екипажот се вклучени помали спасувачки бродови и воени хеликоптери, но мисијата е отежната поради силен ветар во подрачјето на несреќата.
Според американски медиуми, маринците кои биле испратени на рутинска задача на остров на 112 километри од брегот на Калифорнија, во еден момент се јавиле во командата да известат за дефект со возилото во чија внатрешност почнала да навлегува вода.