Реал Мадрид избегна пораз од Барселона во последната минута на гостувањето на „Камп Ноу“ што беше и основна цел на „кралскиот клуб“. Составот на Зинедин Зидан останува без пораз во 17 натпревари во низа во Примера, клупски рекорд што беше поставен под водство на Жозе Мурињо во минатото. Португалецот може да биде и надминат во наредното коло кога на „Сантијаго Бернабеу“ ќе пристигне екипата на Депортиво ла Коруња.
Ако се земат во предвид сите натпрварувања, тогаш серијата на Реал Мадрид изнесува 33 меча без пораз. Последниот на „кралевите“ се случи во април во минатата сезона кога Волфсбург славеше во меч во Лигата на шампиони. Ова е трета најдолга низа во натпревари во шпанското првенство и втора најдолга во историјата на клубот. Во изминатите 33 настапи под водство на Французинот, Реал Мадрид постигна 93 гола и прими 30.