Здружението на новинари на Македонија (ЗНМ) и Самостојниот синдикат на новинари на Македонија (ССНМ) остро ги осудуваат нападот врз новинарот и уредник на „Лидер“, Љупчо Златев што се случил синоќа во еден скопски локал, како и онлајн заканите по безбедноста на новинарката на „Слободен печат“, Мирослава Бурнс.

„Од Министерството за внатрешни работи бараме итно да ги истражи мотивите за нападот врз Златев како и лицата кои биле вклучени во инцидентот. Министерството за внатрешни работи и Основното јавно обвинителство само преку брза постапка ќе покажат дека постои волја за расчистување на случаи во кои има напади врз новинари. Со тоа ќе се придонесе кон обесхрабрување на идни напади, а и ќе се подобри степенот на безбедност на новинарите и медиумските работници“, наведува во реакцијата на ЗНМ за нападот врз Златев.

Во врска со Бурнс, која во текот на вчерашниот ден добила низа закани на својот личен профил на Фејсбук поради објавување текст за свадба во Тетово, укажувајќи дека тоа е спротивно на законската регулатива која се однесува на борбата против Ковид-19, ЗНМ исто така бара МВР и ОЈО да преземат итни дејства.

„Бараме од Министерството за внатрешни работи и Основното јавно обвинителство итно да преземат дејства за откривање на лицата кои стојат зад профилите кои се заканиле на новинарката и да ги изведат пред лицето на правдата. Објавувањето на вакви и слични престапи од јавни собири преку кои може да се загрози јавното здравје е од јавен интерес и новинарите во никој случај не треба да добиваат закани по својот живот поради откривање и обелоденување на ваквите групни собири“, нагласуваат од ЗНМ.

Овој напад, се оценува во соопштението, уште повеќе ја истакнува потребата од законски измени во Кривичниот законик.

„Во соработка со ССНМ подолго време бараме измени со кои нападите врз новинарите и медиумските работници треба да бидат третирани како напад врз службено лице. Ова значи дека со ваквите измени на законот, институциите ќе бидат обврзани по службена должност да преземаат мерки и дејствија за расчистување на нападите врз новинарите“, потсетува ЗНМ.

Здружението напоменува дека сите видови притисоци и закани кон новинарите и медиумските работници негативно се одразуваат врз слободата на изразување и креираат ефект на самоцензура. Од идната влада ЗНМ очекува сериозно да се зафати со креирање на безбедна работна средина за новинарите како еден од најважните предуслови за слободно новинарство.

„Од новата влада, како и од новиот парламентарен состав, ќе продолжиме да бараме итно да се пристапи кон измени и дополнувања на Кривичниот законик со кој ќе се гарантира поголема заштита на новинарите и медиумските работници. Новинарската професија е клучна за функционирањето на секоја демократска држава и затоа сметаме дека е крајно време законски да се заштитат професионалните новинари како едни од клучните столбови за штитење на јавниот интерес“, порачуваат од ЗНМ.

Самостојниот синдикат на новинари и медиумски работници (ССНМ) остро го осудува физичкиот напад врз новинарот Љупче Златев што се случил синоќа во еден скопски локал. Според Златев, тој бил физички нападнат од лице, подоцна идентификувано од нападнатиот, кое се обидело да го исфрли од локалот при што му биле нанесени повеќе лесни телесни повреди.

Нападот е пријавен во полиција и ССНМ, стои во денешното соопштение, очекува брзо откривање на сторителите и нивно изведување пред лицето на правдата .

„Слободата на говор и плурализмот во медиумите се основи на секоја демократија и без основна безбедност на новинарите и медиумските работници, не е можно практикување на оваа професија. Ги повикуваме институциите, МВР и Основното јавно обвинителство итно да постапуваат во ваквите случаи и тие да не се оставаат нерешени, бидејќи неказнивоста значи и еден вид охрабрување на идните престапници“, се наведува во соопштението од ССНМ.

Од ССНМ уште еднаш потсетуваат дека е потребна итна измена на Кривичниот закон, при што нападот врз новинари и медиумски работници ќе се третира како напад врз службено лице, односно институциите ќе мора по службена должност да преземаат дејствија за расчистување на ваквите напади.