По повеќечасовна расправа, Собранието конечно го утврди дневниот ред на 32.седница, на која се наоѓаат 40 тина точки, меѓу кои и законот за употреба на јазиците како осма точка. Иако имаше најава, на дневен ред не беше ставена точката за избор на потпретседатели на Парламентот.
Најжестока дебата имаше по предлогот дали амандманската расправа за Законот за јазиците да се најде на дневниот ред.
Тензијата се зголеми кога собранискиот спикер, Талат Џафери, не им даде право на процедурална забелешка на координаторите на пратеничката група, бидејќи како што рече тој, координаторот на пратениците на ВМРО-ДПМНЕ, Влатко Ѓорчев не бил присутен во Парламентот.
– По одржувањето на конгресот и формирањето на партиските тела, неофицијално ме известија од партијата дека работите во Собранието до официјално избирање на нов координатор, ќе ги координира пратеникот Владимир Ѓорчев. Истиот не е тука и немате право на процедурално, рече Џафери со што предизвика негодување кај пратениците од оваа партија.
Дел од нив станаа од своите места и излегоа на говорницата за да се разберат со Џафери.
Потоа пратеникот од ВМРО-ДПМНЕ, Илија Димовски, побара збор и го замоли Џафери во име на досегашната соработка да се држи, како што рече, до формално-правните обврски.
-Се наоѓаме во момент во кој сме збунети, толкав број амандмани и вие и СДСМ не можете да разберете дека треба да слушнете туѓо мислење, дека експертската јавност мисли поинаку од она што вие имате намера да го направите со Законот за јазици. Како долгогодишен колега ве замолувам да се држиме до форма. Точно е во смисла на тие разговори, но од формално правен аспект не е точно. Се уште немаме допис со промена на моделот според кој ќе функционираме како пратеници, рече Димовски.
Џафери продолжи со седницата и не им даде право на процедурална забелешка на неколкуте координатори на ВМРО-ДПМНЕ.
Секој пратеник од пратеничката група на ВМРО-ДПМНЕ имаше различно барање. Пратениците ги образложуваа своите предлози, што траеше неколку минути, по што се гласаше.
Неколку пратеници бараа исфрлање на точката за Законот за јазици, но мнозинството го отфрли тој предлот, а претседателот Талат Џафери рече дека не може повторно да се одлучува за истото барање.
Потоа еден пратеник побара Законот за јазици да се стави 25-та точка на дневниот ред, друг пратеник побара точката да биде последна на дневниот ред, трет побара сите други точки да бидат исфрлени, а да остане само оваа точка. Парламентарното мнозинство ги одби сите нивните предлози.
Откако дневниот ред беше усвоен од мнозинството, спикерот Џафери даде еден час пауза по што ќе продолжи седницата.