Владата ги затвори истрагите против невладините организации, што беа отворени на крајот од минатата година по најавата на поранешниот премиерот Никола Груевски дека ќе почне процес на „десоросоизација на општеството“.
Министерот за внатрешни работи Оливер Спасовски, кој денеска беше во посета на СВР Скопје, кажа дека истрагите на неколку државни органи не откриле ништо незаконско кај невладините.
Под истрага беа 21 невладина организација.
-По извршените анализи и консултации со Обвинителството за организиран криминал и корупција, МВР, односно Бирото за јавна безбедност, заедно со Управата за финансиска полиција, ги затворивме овие истраги, бидејќи навистина не постојат никакви докази што ќе ја потврдат основаноста на сомненијата дека нешто е направено. Има поднесено една кривична пријава во СВР Струмица, која се однесува на незначителна сума прикривање на персонален данок, меѓутоа никаква друга организирана нелегална дејност од невладините организации во Македонија и затоа е затворена оваа истрага, рече Спасовски.
Веднаш по говорот на Никола Груевски на 17 декември 2016 пред ДИК, тогашната власт започна хајка против повеќе невладини организации кои ги етикетираше како „непријатели на власта и на државата“, а како нивен финансиер го посочуваа сопственикот на фондацијата Сорос, Џорџ Сорос.
Во јануари годинава беше формирани граѓанско здружение „Стоп Операција Сорос“, кое ја етикетираше Фондацијата Сорос како „радикална левичарска и тоталитарна“, и дека нејзината цел е „да се избришат идентитети, народи и нации и да се создаде едно „отвореноопштество“ со кое ќе управува некој од надвор“, што според нив „сериозно ја загрозува безбедноста на Македонија преку своето делување“.
Како негови основачи во медиуите се појавуваа новинарите Цветин Чилиманов, Ненад Мирчевски и Никола Србов.