Повеќе од 200 приврзаници на лидерот на руската опозиција, Алексеј Навални, се приведени на демонстрациите организирани во неколку руски градови.
Неколку десетици демонстранти се приведени во Санкт Петербург, родниот град на претседателот Владимир Путин, кој денеска полни 65 години.
Полицијата интервенираше кога демонстрантите сакаа да го пробијат кордонот.
Телевизијата Русија 24 не извести за протестите, туку вестите ги посвети на читање на честитки кои странски државници му ги упатија на Путин за роденден.
„Владимир Путин на општеството му влеа чувство на љубов и почитување кон татковината“, рече претседателот на Чеченија, Рамзан Кадиров и додаде дека Русија ќе „остане многу моќна империја“.
Гувернерот на Тамбов, регион околу 400 километри југоисточно од Москва, Александар Никитин, посади 65 стебла јаболки како „симбол на единство со Путин“.
Рускиот претседател престојуваше во Сочи, каде е одржан состанок на советот за внатрешна безбедност, изјави портпаролот на Кремљ, Дмитриј Песков.
Протести се одржаа ширум Русија каде демонстрантите бараа од властите на Навални да му се овозможи учество на претседателските избори.
Навални сака да се кандидира за претседател на Русија на изборите во март 2018 година, но неговото учество го оневозможува кривична судска пресуда за која тој тврди дека е политички мотивирана. Навални во 2013 година беше осуден за проневера на 16 милиони рубљи ( 236.000 евра).
Путин се уште не потврди дали ќе се кандидира на изборите, но очекува сепак бара нов шестгодишен мандат и дека со моменталната поддршка до 80 проценти од граѓаните, нема да му биде тешко да ги победи ветераните од претходните избори – лидерот на комунистите Генадиј Зјуганов, ултранационалистот Владимир Жириновски и либералот Григориј Јавлински.