Лидерот на СДСМ, Зоран Заев, на прес-конференција предмалку порача дека изборите треба да се одложат поради состојбите со коронавирусот. Тоа преку својата фејсбук страница го побара и лидерот на ВМРО-ДПМНЕ, Христиојан Мицкоски.
Заев рече дека одлуката е донеса синоќа и најави дека ќе побараат претседателот, Стево Пендаровски, да повика лидерска средба за одложување на изборите, а ако тој не го направи тоа, средба ќе свика СДСМ.
„Сликите од нашата земја да не бидат исти како оние во Кина или Италија. Потребна е посветност и ангажираност на сите. Да се однесуваме одговорно и зрело, затоа што се работи за нашето здравје и на нашите најблиски. Ваквите услови повеќе од јасно е дека не дозволуваат нормална организација на избори. Сега е време секој ресурс да се стави во функција на заштита на граѓаните. Затоа во името на СДСМ да се организира лидерска средба на која ќе се разговара за одложување на изборите. За нас е прифатливо Пендаровски да ја организира оваа средба“, рече Заев.
Ризикот за одржување во најмала рака ја прави, според него, непријатна состојбата. Треба да се оди на гласачките места во ситуација на строги мерки. „Најважниот елемент е здравствената состојба на граѓаните. Ги следиме трендовите, се прават сериозни анализа. За точниот датум, кога би можеле тие да се одржат би оставил да раговараме со сите лидери. Она што во моментов може да се каже е дека тие може да се одржат кога ке биде стабилизирана состојбата“, рече Заев.
Тој рече дека не биле во комуникација со Мицкоски, но добро е, како што вели да имаат заедничко мислење.
„Пресконференцијата беше најавена пред еден час, веројатно од ВМРО-ДПМНЕ знаеле што ќе побараме и затоа претходно реагирал Мицкоски на својот фејсбук профил. Но тоа сега не е важно“, рече Заев.
Во врска со битката за спречување на ширење на вирусот потсети дека Алабанија, Косово, Србија, Грција прогалсиле вонредна состојба. „Тоа е очигледно посериозна алатка за полесно менаџирање на кризата и ние најверојатно ќе се движиме во таа насока“, рече Заев.
Според него Македонија е ретка земја во регионот која навремено презема целосни ефикасни мерки за справување со вирусот и ширењето на заразата. Тој изрази јавна благодарност и признание до сите здравствени работници, армијата, полицијата, секој службеник инволвиран во активностите, како и на новинарите за навременото известување.
Претходно лидерот на ВМРО-ДПМНЕ, Христијан Мицкоски, рече дека сите препораки на релевантните домашни и светски организации се дека најдобар одговор за справување со вирусот е одбегнување на активности.
„Токму кога се предвидувањата за пикот на здравствената криза, во Македонија ќе треба да се одржат избори. Со вакви анализи и предвидувања изборите би значеле отворање на нови жаришта со Корона вирус. Замислете ден на избори кога во една просторија каде има гласање илјадници избирачи ќе гласаат, ќе заокружат со пенкало, ќе имаат личен контакт со членовите на избирачкиот одбор. Денес ќе побарам свикување на лидерска средба кај претседателот Стево Пендаровски со точка на дневен ред разговор за одлагање на предвремените парламентарни избори со цел заштита на здравјето на граѓаните. Потребно е одговорно однесување, кон граѓаните и државата“, напиша Мицкоски на својот фејбук.