Митко Чавков, поранешниот директор на Бирото за јавна безбедност во времето на крвавите настани во Собранието, Горан Ѓошевски, од обезбедувањето на поранешниот спикер Трајко Вељановски, Душко Лазаров и Оливер Поповски од МВР и Митко Пешов од Агенцијата за разузнавање синоќа повторно се приведени, и се пренесени во Истражниот затвор Шутка, потврдија за нова од Кривичниот суд.
Определена им е мерка притвор од 30 дена поради постоење на основано сомнение дека сториле кривично дело „терористичко загрозување на уставниот поредок и безбедноста“.
Кривичниот совет делумно го прифатил барањето на Обвинителството за организиран криминал и корупција кое вчера поднесе обвинение против 30 лица за насилствата во Собранието од 27 април лани и притоа побара и враќање на мерките притвор и куќен притвор за обвинетите – 16 барања за затворски притвор, 12 за куќен притвор и две барања за гаранции.
– Кривичниот совет на одделението за организиран криминал и корупција при Основниот суд Скопје 1 – Скопје, постапувајќи по предлог на Основното јавно обвинителство за гонење на организиран криминал и корупција за определување мерка притвор против М.Ч., М.П., Д.Л. О.П. и Г.Ѓ, донесе решенија со кои делумно го уважи предлгот на обвинителството и им определи мерка притвор во траење од 30 дена поради постоење на основано сомнение дека сториле кривично дело Терористичко загрозување на уставниот поредок и безбедноста од член 313 од КЗ, а поради постоење на причините предвидени во член 165 ст.1 т. 1 од ЗКП, информираат од Судот.
Против овие решенија, како што посочуваат од Судот, странките имаат право на жалба во рок од 24 часа по приемот на решенијата до Апелационот суд – Скопје.
Чавков е еден од обвинетите кои се товарат за терористичко дејствување, односно во Обвинението се споменува како еден од носителите на златна и сребрена команда кои иако знаеле не презелен ништо да спречан насилство. Двајцата вработени во МВР се обвинетите за помагање на ова дело, со тоа што ги одзеле хард дисковите со видео материјалот од насилствата во Собранието, со цел, како што стои во обвинението, да ги скријат доказите.
Хронологија на настаните од крвавиот четврток: Се почнало во 14.30
Петмината се враќаат во истражниот затвор, два дена откако Врховниот суд, на 26 март донесе одлука на овие обвинетите затворскиот притвор да им се замени со куќен.