Битола, до сабота продолжува да биде епицентар на филмските настани кај нас, особено во духот на најстариот фестивал кој ја слави работата на кинематограферите, оние, на кои паѓа товарот на тешката а истовремени нежна работа да ја „центрираат“ камерата, светлото и сета визуелна поставеност на филмската магија.
Од Битола: Ана Василевска
„Девојката со иглата“ и „Зона на интерес“, се насловите на двата филма кои синоќа се прикажаа како дел од официјалната компетиција за „Златна камера 300“ на 45. издание на ИФФК „Браќа Манаки“, двата епохални, работени во црно-бела фотографија. Едниот, временски сместен по првата светска војна, а вториот во периодот и по втората светска воена катастрофа. Веројатно не е случајно, што публиката сведочеше на ваква програмски осмислена ноќ, која како ретко кога ја наполни салата на Центарот за култура во Битола. Силните впечатоци од двете најнови ремек дела на европската кинематографија (едниот кандидат за Оскар, другиот добитник на Оскар за странски филм) , беа уште долго дебатирани денеска по битолските кафулиња, а новинарите имаа можност да дознаат нешто повеќе за „Девојката со иглата“ на прес конференцијата со младиот кинематографер Михал Димек, гостин на фестивалот. Димек, одмерено и скромно одговараше на новинарските прашања, иако навистина „голема енигма“ остана тоа како ова изненадувачко, зачудувачко ремек дело е снимено за само 27 дена.
„Филмот не беше едноставен за работа, снимавме исклучително емотивни сцени, целата екипа едноставно беше соединета во желбата да се извади целината која ја замисли режисерот Магнус фон Хорн. Имавме долго истражување на епохата која требаше да се сними, стотици фотографии ни минаа низ раце. И секако, кога работите црно-бела техника, потребна ви е сивата нијанса, која искрено јас не можев да ја одберам, туку ја најдов низ самиот процес. На крајот, драго ми е што публиката, критиката, ја препозна нашата исцрпувачка работа и го евидентираше филмот како автентично дело“, рече Димек на прес конференцијата.
И навистина, данскиот кандидат за наградата Оскар, „Девојката со иглата“, си го најде вистинското место за компетиција на нашиот фестивал, кој освен што е целовито несекојдневно филмско дело, со кинематограферскиот влог, засега се пласира во во самиот врв за наградата „Златна камера 300“.
На денешната прес конференција говореше и кинематограферката Јоланта Дилевска која нагласи дека своето искуство со задоволство го пренесува на новите генерации, особено охрабрувајќи ги жените кинематограферки. Таа нагласи дека никогаш не се согласила да „влезе“ во проект во кој режисерот/ката, не ја почитува комплетно работата на кинематограферите.
„Да се биде дел од создавањето на филмското дело како кинематографер е многу важен авторски влог. Никогаш не се согласувам да работам на филм ако немам разбирање и почит со режисерот, а ова е и мој клучен совет за помладите генерации„, рече Дилевска.
По прес конференцијата следуваше презентација во киното „Манаки“ насловена Зад сцената на „Зона на интерес“ со 10 SONY Venice камери, на која присуствуваа бројни професионалците и љубопитни гости.
Да потсетиме дека, првиот фестивалски ден на 45. издание на ИФФК „Браќа Манаки“ започна со прес конференции на Бруно Делбонел годинашниот лауреат на Златна камера 300 за животен опус, Дариа Д’Антонио, кинематограферката на „Партенопе“ во режија на Паоло Сорентино – филм со кој синоќа се отвори Фестивалот, Димитар Грбевски, филмски и телевизиски монтажер кој годинава ја доби наградата на ДФРМ, „Голема ѕвезда на македонскиот филм“ и претставување на членовите на жиријата.
Битола, до сабота продолжува да биде епицентар на филмските настани кај нас, особено во духот на најстариот фестивал кој ја слави работата на кинематограферите, оние, на кои паѓа товарот на тешката а истовремени нежна работа да ја „центрираат“ камерата, светлото и сета визуелна поставеност на филмската магија.