Четириесет и пет општини добија градоначалници по првиот круг од локалните избори што се одржаа вчера, а во 35 општини на 29 октомври ќе се гласа во втор круг.
Од досега преброените гласови, излезноста е повеќе од 60 отсто, а исходот од локалните избори кои вчера се одржаа најавува голем пресврт на политичката сцена во Македонија.
СДСМ на овие избори направи целосен пресврт во распоредот на градоначалниците и извојува голема победа.
Во првиот круг избрани се градоначалници на Аеродром, Арачиново, Берово, Битола, Богданци, Босилово, Валандово, Василево, Вевчани, Велес, Гевгелија, Ѓорче Петров, Делчево, Демир Хисар, Дојран, Зелениково, Илинден, Карпош, Кичево, Конче, Кочани, Кратово, Крива Паланка, Крвогаштани, Крушево, Куманово, Лозово, Маврово – Ростуше, Неготино, Ново Село, Охрид, Петровец, Пехчево, Пласница, Прилеп, Радовиш, Ранковце, Ресен, Свети Николе, Сопиште, Струмица, Центар, Центар Жупа, Чучер Сандево и Дебрца.
Втор круг ќе има во Боговиње, Брвеница, Бутел, Виница, Врапиште, Гази Баба, Гостивар, Градско, Дебар, Демир Капија, Пробиштип, Росоман, Долнени, Желино, Зрновци, Јегоновце, Кавадарци, Карбинци, Кисела Вода, Липково, Македонска Каменица, Македонски Брод, Могила, Новаци, Сарај, Старо Нагоричане, Струга, Студеничани, Теарце, Тетово, Чаир, Чашка, Чешиново – Облешево, Штип и Шуто Оризари.
Според Државната изборна комисија, на вчерашните локални избори има 51.164 неважечки ливчиња за гласање за општинските совети, додека за изборите за градоначалници има 45.066 неважечки ливчиња.
ДИК: Конечни резултати ќе има по истекот на роковите за жалби
Изборниот ден генерално помина во мирна атмосфера без поголеми нарушувања на јавниот ред и мир. Од Основното јавно обвинителство денеска информира дека до завршување на изборниот ден, сумарно во Основните јавни обвинителства во Република Македонија се постапува во шест кривични дела.
„Еден во ОЈО Битола, два во ОЈО Кочани и три во ОЈО Скопје. Во нив обвинителството постапува поради утврдено постоење на основано сомнение дека се сторени кривични дела поврзани со изборниот процес. Во текот на овие предистражни постапки кои се водат во обвинителствата се преземаат дејствија за прибирање на докази за комплетирање на предметите и донесување на јавно обвинителски одлуки за натамошно постапување“,рече Џељаљ Бајрами, претседателот на Привремената комисија при ЈОРМ за следење на изборни нерегуларности.
Делата за кои се водат постапките се однесуваат на „Поткуп при избори и гласање“, „Злоупотреба на избирачко право“ и „Изборна измама“.
„Основните јавни обвинителства во Република Македонија исто така постапуваат и за други седум настани, за кои јавните обвинителства имаат добиено известувања од Министерството за внатрешни работи или пријави од граѓани и други надлежни институции, а каде засега има само основи на сомнение дека има елементи на сторени кривични дела. Во овие предистражни постапки за настани кои се случиле на територија на ОЈО Битола, Охрид, Струга, Скопје и Кочани, јавните обвинителства преземаат дејствија за утврдување на факти, во насока на тоа дали воопшто има елементи на сторени кривични дела. Постапките се за евентуално сторени кривични дела „Повреда на слобода на определување на избирачите“, „Поткуп при избори и гласање“, „Противзаконито располагање со буџетски средства за време на избори“, рече Бајрами.
Тој додаде дека во текот на изборниот ден, во Основните јавни обвинителства , како и во Комисијата за следење на изборни нерегуларности и преку електронската адреса izbori@jorm.gov.mk пристигнати биле бројни известувања и дека во голем дел од пристигнатите известувања не се утврдени елементи на сторени кривични дела за кои гонењето се презема по службена должност.