Американските разузнавачки агенции и полицијата се уверени дека Исламската држава и другите терористички организации развиле иновативни начини за уфрлување експлозив во електронски уреди, кои според тестирањето што го објави ФБИ, можат да поминат незабележано при вообичаените методи на скенирање на аеродромите, објави Си Ен Ен.
Американската телевизија објавува дека заострувањето на мерките на безбедност воведени на 21 март со забрана на многу електронски уреди да се внесуваат во патничкиот дел на авионите кои директно летаат до САД од осум земји од Блискиот исток и Африка, уследиле по неколкумесечно собирање податоци.
Разузнавачите дошле до сознанија дека терористите набавиле модерна опрема каква што користи обезбедувањето на аеродромите за да проверат колку успешно можат да скријат експлозив во лаптоп компјутери и во други електронски уреди.
Се наведува дека ова во голема мерка влијаело на одлуката на администрацијата на претседателот Доналд Трамп да забрани, патниците кои пристигнуваат директно од десет аеродроми од осум земји, во текот на летот да користат компјутери и електронски уреди.