Од денеска почнуваат да важат новите правила за вршење контрола на надворешните граници на ЕУ. Тоа подразбира систематски проверки за сите патници, поради усвоените амандмани на Законот за шенгенските граници, според кои, земјите членки на Шенген се обврзани на построга контрола.
Ваквите нови правила се донесени на предлог на Европската Комисија, по нападите од Париз, во ноември 2015 година.
Според досегашната пракса граничарите само вршеа рутинска проверка на патните документи на граѓаните на ЕУ. Но отсега, тие документи ќе се проверуваат и во Шенгенскиот систем за информација (СИС), базата на Интерпол за украдени и изгубени патни документи, како и во државните бази.
Сојузната полиција во Германија и Министерството за внатрешни работи, како што објави Дојче Веле на македонски јазик , соопшти дека сите патници кои на германските аеродроми или пристаништа доаѓаат од земји кои не се дел од Шенгенскиот простор, детално ќе бидат проверувани и споредувани личните податоци и бројот на пасошите со податоците на лица по кои е распишана потерница.