Лидерот на ВМРО-ДПМНЕ, Никола Груевски, денеска присуствуваше на официјално отворање на нова инвестиција за одгледување и преработка на медицински канабис во Скопје. Тој и овој пат не пропушти можност повторно да испрати порака до СДСМ и до народот и нагласи дека во Собранието не се водела борба за власт, туку борба за Македонија.
„Она што е очигледно е дека на СДСМ му смета ВМРО-ДПМНЕ, му смета и народот затоа што имаат преземено обврски, но не кон народот и не кон некој што ја сака државата, унитарна и цела. Имаат преземено обврски и се исплашени за нивната иднина особено нивниот лидер Зоран Заев којшто формирањето влада и прифаќањето на фактурата што треба да ја плати со задоволство ќе ја плати доколку народот не му попречи и доколку ВМРО-ДПМНЕ не е тука. За него во неговите мисли ќе значи спас од казна за она што го правеше во минатото. За неговите криминали, за неговите корупции, за неговите поткупи итн. Така што политичката борба во Парламентот не е борба за власт, таа е борба за Македонија, таква каква што ја имаме унитарна, целовита со ова име коешто го имаме или пак сменета на начин на којшто некој однадвор сака да ја смени и да ја обезличи“, рече Груевски.