Пауло Дибала останува партнер на Гонзало Игуаин во нападот на Јувентус. Младиот Аргентинецот потпиша нов договор со италијанскиот првак со важност до 2022 година. Обновената соработка следува по двата негови гола во убедливата победа на „старата дама“ над Барселона (3:0) во четврт-финалето во Лигата на шампиони.
„Ова е голем потег во насока на иднината. Дибала е наш уште пет години“, се наведува во веста на интернет страницата на Јувентус.
Двете страни беа во преговори во изминатиот период, а фудбалерот ги расчисти дилемите по првиот четврт-финален дуел во ЛШ во Торино по кој порача дека не го интересираат понудите на Реал Мадрид и Барселона.
За предвремено постигнатиот договор меѓу играчот и клубот, Палермо, како негова поранешна средина, ќе добие осум милиони евра. Годишната заработувачка на Дибала ќе биде седум милиони евра што го прават да биде втор најплатен фудбалер во соблекувалната на Масимилијано Алегри со пола милион помалку од Игуаин.