Нема простор за насилство во демократските процеси, и секој кој извршил, организирал или наредил напад врз пратениците, треба да одговара, порачува амбасадорката на САД во ОБСЕ, Кејт М. Брнс.
Во обраќање кон претседавачот со ОБСЕ, Австрија, а во однос на последните случувања во Македонија, Брнс вели, САД строго ги осудуваат нападите врз народните избраници и останатите, и дека се подготвени да работат со новиот собраниски спикер, Талат Џафери.
– Строго го осудуваме насилните напади врз пратениците во македонскиот Парламент кои се случија по изборот на Талат Џафери за нов спикер. Ќе работиме со него и Парламентот за поддршка на демократијата и да и помогнеме на Македонија да се движи напред кон европскиот пат. Нема прстор за насилство во демократскиот процес. Изразуваме длабока солидарност со повредените пратеници и другите повредени. Бараме од властите да гарантираат безбедност за пратениците, темелно да ги истражат нападите и секој кој извршил, организирал или наредил напад, да одговара, потенцира амбасадорката.
Напоменувајќи дека САД и нивните сојузници во НАТО, како и партнерите од ЕУ, одблизу ги следат случувањата во Македонија, таа вели како стратегиски партнер и пријател на Македонија, и со целосна почит на нејзиниот суверенитет и унитарност, САД ги повикува сите страни да ги стават интересите на Македонија и на граѓаните на прво место, да работат конструктивно и целосно да ги имплементираат обврските од Договорот од Пржино.
– Од партиите бараме да ги надминат разликите мирно и да ги почитуваат законите и демократските процеси во Македонија. Само така може да се надмине политичката криза, почитувајќи ги законите и волјата искажана од страна на граѓаните на изборите во декември, порачува Брнс.