Реал М. и Јувентус ќе играат во финалето на Лигата на шампиони за оваа сезона. Атлетико вечерва славеше на „Висенте Калдерон“ со 2:1, но „кралскиот“ клуб ќе истрча на „Милениум“ во Кардиф на 3 јуни на мегдан со италијанскиот првак благодарение на убедливиот триумф со 3:0 на првата средба.
Чудо малку кој очекуваше во реваншот меѓу мадридските ривали. Дека е можно најавија домашните кои во само четири минути анулираа два гола од негативата. „Јорганџиите“ поведоа во 12 минута преку Нигез по асистенција на Коке, а на 2:0 зголеми Гризман од белата точка во 16 минута.
Тежиштето на играта од тој момент се пренсе на средина на тревникот. Реал успеа да ги амортизира налетите на Атлетико и во 42 минута да стави крај на сите дилеми околу победникот во двомечот. Иско, по додавање на Тони Крос, погоди за намалување на 2:1, гол што се покажа како решавачки за 16 финале за „кралевите“ во ЛШ.
Тимот на Диего Симеоне не застана во продолжение на средбата. Најсериозните закани за трет погодок беа оние на Гамеиро и Караско во 67 минута пришто Кејлор Навас не дозволи повторно да биде матиран. Последните 20-тина минути не донесоа особени возбудувања, Реал М. ја имаше контролата и рутински го приведе натпреварот до крај.
Јувентус, пак, синоќа во Торино го порази Монако со 2:1 и со вкупни 4:1 се најави во престолнината на Велс.
Лига на шампиони
Полуфинале – реванш мечеви
Атлетико М. – Реал М. 2:1 (резултат од прв меч 0:3)
Јувентус – Монако 2:1 (2:0)