Паралелно со подготовките за ракометниот Фајналфор турнир во Келн, управата на Вардар го крои и ростерот за наредната натпреварувачка сезона. Во тој контекст и продолжената соработка со Данил Шишкарев. Актуелниот договорот на рускиот интернационалец со македонскиот првак беше со важност до јуни, но „црвено-црното“ десно крило се обврза да остане во Скопје уште 12 месеци. На почетокот на оваа работна недела и Илија Абутовиќ парафира верност кон вардарци до 2020 година.
Шишкарев пристигна во Вардар во 2014 година од екипата на Чеховски медведи за која настапуваше пет сезони. Претходно го носеше и дресот на Астрахан. Со тимот од СЦ „Јане Сандански“ освои по две шампионски титули во домашното првенство и во регионалната СЕХА лига. На почетокот на идниот месец за првпат во кариерата ќе заигра на завршен турнир во Лигата на шампиони (ЛШ). Вардар во полуфиналето го очекува пресметка со Барселона на Кире Лазаров и Борко Ристовски.
Оваа сезона постигна 30 гола за вардарци во елитното натпреварување од кои пет во реванш четвртфиналниот меч со Фленсбург во Скопје.