Министерот за здравство во заминување, Никола Тодоров, денеска потпиша договор за изградба на новиот Клинички центар во вредност од 72 милиони евра. Овој договор кој се потпиша во свечената сала на Владата, се случува во исто време кога во тек се преговорите за состав на новата влада предводена од СДСМ.
Се очекува градежните работи да траат 45 месеци од почетокот на градбата.
Клиничкиот центар ќе го градат „Гранит“ и „Бетон“ и италијанската компанија Инсо Системи.
Во првиот ред на потпишувањето на договорот беше премиерот во заминување, Емил Димитриев, како и лидерот на ВМРО-ДПМНЕ, Никола Груевски.
Пред нив, министерот во заминување, Никола Тодоров рече дека со неговиот тим работеле четири години интензивно со меѓународни консултантски тимови составени од експерти од Шпанија, Германија, Грција и други западноевропски земји со целосна поддршка на Банката при Советот на Европа.
По завршување на церемонијата, Тодоров избегна да одговори на новинарските прашања, кои го прашаа во кое својство го потпишал договорот.
– Некои луѓе сакаат нешто да се случи, други посакуваат тоа да се случеше, но оние вистинските прават тоа навистина да се случи. На овој проект јас и мојот тим работевме напорно и посветено. За цело време ја имавме полната поддршка од Владата и од премиерот, но овој проект не е само наш проект, ова е национален проект. Проект на државата Република Македонија. Здравјето не препознава политичка, етничка или каква било припадност и затоа најважно е овој проект целосно и навремено да се реализира со цел што е можно побргу придобивките од новиот клинички центар да ги имаат граѓаните и државата, рече Тодоров при презентацијата на проектот.
Новата зграда на клиничкиот центар ќе биде со нето површина од 46.987 метри квадратни корисен простор, 6.416 метри квадратни проодни тераси и кровни градини и 531 метар квадратен хелиодром.
Објектот ќе се состои од едно подземно ниво, приземје, девет ката и хелиодром за транспорт на пациентите на 10-то ниво.