Кривичниот совет на Основниот суд Скопје 1 денеска ќе решава по жалбата на Специјалното јавно обвинителство против одлуката на судија на претходна постапка да не му биде одредена мерка притвор на бизнисменот Сеад Кочан, објави „Мета“.
Аргументите на СЈО, дека е неопходно да му се одреди притвор на Кочан ќе ги застапуваат обвинителите Гаврил Бубевски и Артан Ајро.
Во четвртокот судија на претходна постапка донесе одлука на Кочан да не му биде одредена мерка притвор, туку тој да се брани од слобода со гаранција со 900.000 евра и обврска еднаш неделно да се јавува во суд.
Кривичниот суд по втор пат одлучува за притворот на Кочан, бидејќи претходните одлуки беа укинати од Врховниот суд, а предметот беше вратен на повторно разгледување.
Кочан е првоосмничен во случајот „Труст“ на СЈО и се сомничи дека со фалсификувани документи добил тендер од ЕЛЕМ во вредност од 17 милиони евра.