Преговорите за составот на новата влада денес се воделе помеѓу СДСМ и движењето БЕСА но не е разговарано за поделба на ресори ниту пак може отсега да се каже дали БЕСА ќе биде дел од владата.
Генералниот секретар на СДСМ Оливер Спасовски изјави дека се завршени разговорите со БЕСА а преговорите продолжуваат во наредните денови:
“Начелно, разговаравме за принципите на кои треба да биде формирана идната реформска Влада. Принципите во однос на тоа кои луѓе, какви кадри се потребни за да имаме реформи, меѓутоа, тоа е на принципиелни основи и очекуваме дека во наредниот период ќе отвориме малку повеќе детали околу составот на идната влада, се со цел да постигнеме договор и со БЕСА и со другите политички субјекти кои се дел, односно треба да бидат дел од новото парламентарно мнозинство”, изјави Спасовски.
Според Спасовски “одлуката за поделба на ресори и за кадровски решенија ќе ја соопштиме во моментот кога ќе ја имаме”.
“Сега разговаравме за принципите, не разговаравме воопшто ниту за поделба на ресори, ниту за други детали кои треба да ги имаме утврдено при праќање на предлогот, така што како за првична средба можам да оценам дека е позитивна, но ќе треба да продолжиме уште многу да работиме.
Не разговараме за условување на едните и другите, разговараме за принципи. За нас како Социјалдемократски сојуз е важно да има принципи на основа на кои ќе биде формирана идната реформска Влада, а не на основа на условување меѓу партнерите, бидејќи тоа не е добар начин на комуникација”, изјави тој.
Утре продолжуваат преговорите со сите партии од идната владина коалиција.