Денеска во 12 часот на пладне треба да продолжи седницата на Собранието на која пратениците треба да ја изберат новата влада.
Фокус на вчерашната расправа беше програмата на новата влада, која мандатарот Зоран Заев ја презентираше пред народните избраници.
Како што рече Заев, програмата на новата влада ќе биде заснована на три начела. Економијата и живот за сите, силни професионални институции и правда за сите, членство во Европската Унија и НАТО и перспективи за сите
„Програмата на новата реформска влада на унитарна Македонија и ги содржи принципите од предизборната програма на СДСМ, предизборните кампањи на партиите кои се дел од новото парламентарно мнозинство – ДУИ и Алијанса за Албанците, но и на другите партии кои немаат пратеници. Македонија ќе биде држава на сите граѓани, да градиме едно обединето општество кое ќе обезбеди стабилност за граѓаните и државата, а ЕУ и НАТО остануваат стратешки цели на државата, како и спроведувањето на итните реформски приоритети што се дел од Договорот во Пржино, рече Заев во експозето.
Претседателот на Собранието Талат Џафери на крајот на вчерашната седница ги предупреди пратениците да доаѓаат на време, бидејќи тој нема да толерира доцнење.
„Димитар Стеванаџија е прв говорник утре и ако мисли да земе збор, да дојде на време. Да разберете дека по однос на времето сум прилично точен и не би сакал да дојдеме во ситуација да му одземам збор на тој што не дошол овде на време“, рече Џафери.
Пратениците за програмата ќе можат да дискутираат до вечерва на полноќ, а потоа ќе мора да гласаат за изборот на новата влада.