Министерот за внатрешни работи Оливер Спасовски попладнево на прес – конференција соопшти дека Извештајот на работната група во МВР за настаните од 27 април во Собранието ги утврдил формално правните пропусти и ги открил систематските недоследности во Министерството.
– Овој орган, падна на испитот на 27 април, поради партизирање на раководните структури. Ова Министерство мора да се департизира, да се ослободи за да работи и нормално да функционира. На граѓаните, им должиме да го исчистиме срамот кој се случи на 27-ми април. Имаме суспензии на повеќе од 20 луѓе, поточно 23, поведени се дисциплински постапки за 45 лица, а во тек е целокупна истрага за тој инцидент. До овој момент, немаме разрешување за било која од тие позиции, изјави Спасовски.
Извештајот, како што рече, прецизно, филигрантски ги детектира одговорностите за тоа што се случи во Собранието, но не соопшти никакви имиња бидејќи извештајот бил класифициран документ.
Тој ќе биде доставен до Јавното обвинителство кое треба да ги утврди сите можни одговорности, персонални и објективни, за секој кој ги пречекорил законските надлежности.
Спасовски потенцира дека за „срамниот чин“ во Собранието мора да има одговорности и санкции и дека Министерството за внатрешни работи мора да се деполитизира, декриминализира и департизира.
На почетокот, Спасовски кажа дека работната група работела повеќе од еден месец, извршила увид во обемната службена документација, разговарала со голем број припадници на МВР и бил прегледан службен видео материјал и видео материјал од телевизиите.
Извештајот што го добија медиумите е преработен сепарат од целосниот извештај на работната група и не е достапен за општа употреба.
Спасовски исто така информираше дека веднаш по настаните, еден дел од структурите на МВР добиле задача да се направи извештај за еден ден кој би ја оправдал работата на полицијата но, не откри по чија директива. Тој откри дека според извештајот при полициска интервенција во Собранието не се испочитувани во целост процедурите и дека немало единствена команда при донесување на одлуките.