Коалицијата чиј кандидат за премиер е Рамуш Харадинај освои 40. отсто од гласовите, покажуваат прелиминарните резултати.
Како што пренесуваат медиумите од Косово, на второто место е движењето Самоопределување, кое освои 30. проценти од гласовите, а на трето место е Демократскиот сојуз на Косово, Алијанса за ново Косово и Иницијативата Алтернатива со 27. отсто од гласовите.
Според првичните анализи резултатот покажува дека се случија промени, бидејќи движењето Самоопределување, како самостојна партија, без коалиционен партнер успеа да обезбеди одличен резултат.
Централната изборна комисија најави дека во текот на вечерта ќе излезе со прелиминарни резултати од денешните избори.
На вонредните парламентарни избори околу 1,8 милиони запишани гласачи бираа 120 пратеници.Изборите ги следат околу 5.000 набљудувачи.
Во кратката и бурна кампања се претставија 25 партии, коалициии и групи граѓани.
Главни прашања во текот на кампањата, освен економијата беа трите прашања кои беа причина за гласање недоверба на владата на Иса Мустафа: демаркација на границата со Црна Гора, формирање на Заедница на српски општини и трансформација на безбедносните и вооружените сили на Косово.
Албанската политичка сцена на на Косово е поделена во два блока – едната се партиите кои според албанските медиуми, произлегува од „военото крило“ и е коалицијата на Демократската партија на Косово, Алијансата за иднината на Косово, Иницијативата за Косово и девет помали партии, и втората, коалиција на „мирот“, составена од Демократскиот сојуз на Косово, Алијанса за ново Косово и иницијативата Алтернатива.
Кандидат за премиер на првиот блок е Рамуш Харадинај, а на вториот Авдулах Хоти.
На овие избори самостојно настапи десно ориентираното Движење Самоопредеување, а нивен кандидат за премиер е Албин Курти, основач на движењето.