Опстанок во Прва лига во дебитантската сезона, постепено пуштање корени во неа и насочување на курсот кон Европа, изградба на тренинг центар кој е во фаза на реализација и сопствен стадион за играње на мечевите како домаќин и потпирање на млади играчи. Ова се амбициите и плановите на Академија Пандев, клуб чиј сопственик е капитенот на македонската репрезентација Горан Пандев и кој наесен за првпат ќе заигра во елитното домашно фудбалско друштво.
„Постигнавме голем успех со пласманот во Прва лига, но немаме намера тука и да застанеме. Среќни сме што ја исполнивме целта по седум години од формирањето. На почетокот инвестиравме многу во млади категории, по некоја година направивме и прв тим што ќе биде од елитата. Амбиција е да бидеме стабилен прволигаш, а од нашиот проект да има корист и националниот тим“, рече Пандев на денешната прес-конеференција во Скопје на која, меѓудругото, беше претставен и новиот дизајн на дресови и лого на клубот.
Меѓу новините во најава е „Куп Горан Пандев“ што треба да стартува од 2018 година потоа „Горан Пандев камп“ (во план е организација во Скопје, во Струмица и во Охрид) и формирање на младински школи низ цела Македонија за што досега има договори за Тетово, за Гостивар, за Куманово, за Гази Баба и за Илинден.
Академија Пандев од утре почнува со подготовки за новата сезона. Првата фаза ќе биде одработена во Струмица, за втората ќе следува преселба во Банско, Бугарија, каде се договорени и шест пријателски натпревари. На екипата и пристапија Чешмеџиев и Вујанац, а ја напуштија Деспотовски, Начевски, Николов и Багажовски. Своите натпревари како домаќин, тимот ќе ги игра на стадионот „Младост“ во Струмица или на „Кукуш“ во Турново до финиширање на сопствениот стадион.