Машката одбојкарска репрезентација на Македонија ќе игра во трето финале во низа во Европската лига. „Црвено-жолтите“ во полуфиналето на Фајналфор турнирот во Гентофте ја поразија домашната селекција на Данска со 3:2 (по сетови: 19:25, 20:25, 25:14, 25:20, 15:11). Ривал во утрешниот меч за титулата (19 ч.) ќе биде Украина која со идентичен резултат беше подобра од Шведска (по сетови: 23:25, 25:19, 25:16, 22:25, 18:16).
Данците почнаа одлично, успеаја до водство со 2:0 и беа на праг на втора победа во шестото соочување со најдобрите македонски одбојкари. Но, наместо таквото сценарио по нивна мерка и желба, следуваше будење на неприкосновените во групната фаза што резултира со пресврт по 122 минути игра за шок и неверување меѓу навивачите на трибините.
Домашните знаеја од каде ќе доаѓа најголемата опасност по нив, но не успеаја да го запрат Никола Ѓорѓиев. Одбојкарот на полски ОНИКО од Варшава впиша 26 поени и беше вистински лидер на националниот тим иако сите до еден одиграа на ниво и покрај двата воведни сета што завршија на страна на Данска.
Македонија, конечно, се надева дека ќе успее до премиерна титула во летното натпреварување на Европската одбојкарска конфедерација (ЦЕВ) по ланскиот пораз (0:3) од Естонија на завршниот турнир во Варна и од Словенија со ист резултат во финалето на Валбржих, Полска.
Европска лига 2017/Фајналфор/ Гентофте
Полуфинале
Данска – Македонија 2:3 (по сетови: 25:19, 25:20, 14:25, 20: 25, 11:15)
Украина – Шведска 3:2 (по сетови: 23:25, 25:19, 25:16, 22:25, 18:16)