Македонската одбојкарска репрезентација ниту во третиот обид не успеа до злато во Европската лига. Шампионскиот пехар до наредното издание ќе престојува во Украина чија селекција во финалето во Гентофте, Данска, ги совлада „црвено-жолтите“ со 3:1 (по сетови: 25:15, 25:22, 24:26, 25:13). Третото место на завршниот турнир го освои Шведска која во меч за бронзениот медал ја порази Данска со 3:1 (по сетови: 25:23, 16:25, 25:19, 25:21).
Поразот во финалето беше прв за Македонија во годинашното издание на натпреварувањето. Двата турнира во групната фаза ги заврши со максимален ефект. Шесте победи, по три во Скопје и во Тирана, го правеа националниот тим фаворит и на Фајналфор турнирот, особено по триумфот со пресврт во полуфиналето против Данска. Но, Украинците беа на ниво кога најмалку им одговараше на избраниците на Драгутин Балтиќ.
Воедно ова беше трет пораз на „црвено-жолтите“ во мечевите за титулата во Европската лига во четвртото учество на завршните турнири. Во 2014 година мораа да се задоволат со бронза, откако Црна Гора го доби двомечот со златен сет со 15:10 (двете репрезентации забележаа идентични победи по 3:1 на домашен терен). Наредната сезона во финалето на Фајналфорот во Валбжих, Полска, загубија од Словенија со 0:3 (по сетови: 21:25, 20:25, 17:25), а лани во Варна беа поразени и од Естонија со 0:3 (по сетови: 19:25, 13:25, 23:25).
Европска лига 2017
Финале
Украина – Македонија 3:1 (по сетови: 25:15, 25:22, 24:26, 25:13)
За 3. место
Шведска – Данска 3:1 (по сетови: 25:23, 16:25, 25:19, 25:21)