Во петокот даде согласност пред матичар во Розарио за стапување во брак во девојката што ја познава од детство, денеска, пак, и кажа „Да“ и на Барселона. Лионел Меси останува на „Камп Ноу“ до 2021 година и според понудените услови ќе има 570.000 евра неделна плата што заедно со Кристијано Роналдо имаат втори највносни договори по Карлос Тевез кој неделно во Кина брои 130.000 евра повеќе од Аргентинецот и Португалецот.
„Посветеноста и постигнатиот договор со Меси нè прават среќни сите во клубот. Импресивно е што и во иднина ќе го имаме најдобриот фудбалер во историјата кој целата своја професионална кариера ја мина со нас и притоа го предводеше тимот до неверојатни успеси“, се вели во соопштението на Барселона по повод, за нив, радосната вест.
Каталонците ја објавија и висината на откупната клаузула за аргентинскиот фудбалски волшебник. Па, ако некој изрази желба да им го украде пред истек на договорот, ќе мора да изрази и подготвеност да плати 300 милиони евра.
Навивачите на Барселона сега можат да здивнат по периодот на неизвеност што го имаа околу судбината на Меси. Неговиот договор со клубот имаше рок на важност до 2018 година и стравуваа дека можеби ќе нема да дојде до заеднички јазик за задржување на „десетката“ што ќе претставуваше голем удар за нив.
Меси е под капата на Барселона уште како 13 годишно момче и веднаш по прекомандата во првата екипа почна со демонстрација на раскошниот талент и потенцијал што го поседува. Оттогаш до сега настапи во 585 натпревари во „црвено-синиот“ дрес во кои постигна 510 гола.
Со Каталонците се радуваше на 29 трофеи од кои девет во Примера, четири во Лигата на шампиони, пет во кралскиот Куп, по три во европскиот Суперкуп и на светскитте клупски првенства и шест во шпанскиот Суперкуп. Пет пати, во меѓувреме, ја понесуваше и наградата „Златна топка“ за најдобар фудбалер на годината.