Италијанските фудбалски прилики и денеска во центар на внимание на европската јавност. Војчех Шчесни, кој досега беше под договор со Арсенал, а изминатите две сезони ги мина на позајмица во Рома, е нов член на Јувентус. Вредноста на соработката меѓу полскиот репрезентативен голман и шампионот во Серија А, според медиуми на Апенините, е 10 милони евра плус два милиона во вид на бонуси или 3,5 милиони евра по сезона. Полјакот во првата сезона ќе биде резерва на Џанлуиџи Буфон кој најави повлекување по Светското првенство во Русија наредното лето.
Антонио Касано, пак, реши да ѝ каже збогум на фудбалската игра. Според „Газета дело Спорт“, поранешниот репрезентативец на „азурите“ ќе го раскине договорот со Верона што го потпиша пред само осум дена и засекогаш ќе ги обеси копачките на ѕид. Напаѓачот во кариерата настапуваше за Бари, за Рома, за Реал Мадрид, за Сампдорија, за Милан, за Интер и за Парма. За националниот тим одигра 39 меча во кои постигна 10 гола.