Пратениците од СДСМ нема да учестуваат во ваква бесмислена расправа и покрај тоа што имаме многу да зборуваме за Марко Зврлевски, за стотиците кои неосновано завршија во затвор и за не порекнувањето обвиненија, рече координаторот на пратеничката група на СДСМ, Томислав Тунтев.
– На оваа седница се зборува за се освен за точката на дневен ред. Си го трошиме времето, а и парите на граѓаните, рече Тунтев.
Координаторот на СДСМ обраќајќи се кон пратениците од опозицијата рече дека време е да се тргне кон реформите кои ги очекува Европската Унија и граѓаните на Република Македонија.
Сите пратеници од СДСМ кои беа пријавени за збор не се присутни во Собраниската сала.
Пратениците од опозицијата остануваат на своите ставови дека во моментов е поважно да се разговара за пожарите, мигрантите и Законот за јазици наместо, за како што велат, незаконското разрешување на Марко Зврлевски кое според нив е спротивно на членот 8а од Изборниот законик.
Тие ги нападнаа медиумите и невладините организации дека одработуваат за власта со критики до опозицијата дека го блокира разрешувањето на јавниот обвинител, наместо да известуваат за „важните прашања“.
– Деновиве имаме оркестрирани напади од одредени портали на кои ударните наслови им се дека ВМРО-ДПМНЕ не дозволува и го блокира разрешувањето на Марко Зврлевски, а молчат за важните прашања. Марко Зврлевски ќе биде разрешен, но по 16 октомври, членот 8-а од Изборниот законик е јасен, рече пратеникот Никола Мицевски.
И на денешното продолжение на седницата пратениците на ВМРО-ДПМНЕ меѓусебно си реплицираат и контрареплицираат. Пратеничката Даниела Рангелова од ВМРО-ДПМНЕ ги повика пратениците од владејачката СДСМ да се вклучат во дискусијата и да ги кажат своите аргументи за разрешување на Зврлевски.