Мадона (59) се пресели во Лисабон каде ќе живее во наредниот период. Причина не е организација на концерт или почеток на европска или светска турнеја на американската поп пејачка туку е спортска, поточно, фудбалска. Нејзиниот 11 годишен син, Дејвид Бандa ќе биде дел од академијата на Бенфика која важи за една од најпознатите во Европа.
Дејвид е роден во Малави и, според пишување на португалските медиуми, ги минал тестовите и доби чест да навлегува во тајните на фудбалската игра преку младинските погони во клубот од „Луж“. Како поддршка притоа ќе ја има славната Американка која изрази желба да биде со него и одблиску да го следи неговиот развој.
„Мадона не е туристка туку жителка на Лисабон“, напиша португалскиот магазин „Вижао“ објавувајќи и фотографии од 59 годишната пејачка низ улиците на главниот град.
Мадона неодамна купила вила во местото Синтра во близина на Лисабон. Тамошните медиуми објавија дека избраниот објект е од 18 век, платен е 7,5 милиони евра и во тек е негово реновирање што би можело да трае и со месеци. Додека се вселат во него, Мадона ќе живее во луксузен хотел, а Дејвид во интернатот на Академијата на Бенфика.
Мадона го посвои Дејвид во 2006 година, а во 2009 година и неговата сонародничка Мерси Џејмс. Покрај нив двајца, од 1996 година ја има и ќерката Лурд од врската со Карлос Леон кој беше нејзин личен тренер, а во 2000 година го доби и синот Роко додека беше во брак со британскиот режисер Гај Ричи.