Застрашувачки вовед на Челзи и на ПСЖ, убедливи победи и на останатите топ фаворити во првата фудбалска вечер од новата сезоната во УЕФА Лигата на шампиони. „Жртва“ на премиерлигашот од „Стемфорд бриџ“ беше Карабаг чие гостување во Лондон се претвори во кошмарно од резултатски аспект. „Сините“ го декласираа дебитантот во елитата со 6:0 и потврдија дека ќе нема место за изненадувања во групата Ц кога е во прашање пласман во нокаут фазата.
Стрелци за составот на Антонио Конте беа Педро во петтата минута, Запакоста во 30., Азпиликуета во 53., Бакајоко во 71., Бачуаи во 76. и Медведев со автогол во 82. Рома и Атлетико Мадрид одиграа 0:0 во Рим во вториот меч во конкуренцијата и единствен без голови од осумте на фудбалските тревници ширум Европа. Римјаните на крајот треба да бидат и задоволни со освоениот бод по големиот број неискористени прилики на екипата од „Висенте Калдерон“ и одличниот Алисон на голот.
Фудбалерите на ПСЖ, пак, беа за еден гол понеефикасни од колегите од Челзи. „Светците“ го понижија Селтик во Глазгов со 5:0 и се најавија како фаворити за првите две места во групата Б со Баерн Минхен. Двоен стрелец за парижаните беше Единсон Кавани во 40 минута од пенал и во 85 минута, откако серијата голови на „Селтик парк“ ја отворија најскапите играчи од летниот преоден рок што заедно чинат 402 милиона евра. Нејмар погоди во 19 минута, Мбапе во 34., а меѓу стрелците се впиша и Лустиг со автогол во 83 минута.
Баерн М. ја оправда улогата на апсолутен фаворит во дуелот со Андерлехт на „Алијанц арена“. Баварците славеа со 3:0 со погодоците на Левандовски во 12 минута од пенал, на Алкантара во 65. и на Кимих во 90. Олеснителна околност за домашните беше и црвениот картон на Кумс ги остави на цедило бледите Белгијците уште во 11 минута.
Манчестер јунајтед со победа се врати во Лигата на шампиони. „Црвените ѓаволи“ го поразија Базел со 3:0 и од тим во созревање, како што ги претстави Мурињо, се промовираа во тим за највисок дострел во ЛШ во оваа сезона. Фелаини во 35 минута, Лукаку во 53. и Рашфорд во 84. погодија за радост на „Олд Трафорд“ и за континуитет на одличниот старт на сезоната и во Премиерлигата.
Московска ЦСКА го остави во молк стадионот „Луж“ во Лисабон. „Армејците“ ја совладаа Бенфика со 2:1 со пресврт во второто полувреме. Харис Сеферовиќ обезбеди водство за Португалците во 50 минута на што Русите возвратија преку Витињо од пенал во 63 минута и преку Жалалетдинов во 71. за понесување на големи три бода од Пиринеите.
И, конечно, во групата Д, Барселона на „Камп Ноу“ убедлива како и Манчестер Ј. и Баерн М. Каталонците во меч што беше означен како дерби на вечерта триумфираа над Јувентус со 3:0 со два гола на Меси во 45 минута и во 69., во меѓувреме (56′) и Ракитиќ успеа да го совлада Буфон.
Олимпијакос доцна се разбуди во дуелот со Споринг Лисабон. Португалскиот состав славеше со 3:2 во Пиреја, но и покрај трите гола во првото полувреме на крајот можеше да остане без два бода. Думбија во втората минута, Мартинс во 13. и Фернандеш во 43. „стрелаа“ во домашната мрежа за студен туш на стадионот „Јоргос Караискакис“. Влегувањето во игра на Пардо во 78 минута ги размрда „црвено-белите“. Во 89 минута го постигна првиот гол, во судиското надополнување и вториот меѓутоа време за трет немаше.
Стефан Ристовски го почна мечот меѓу резервистите на Спортинг и во игра влезе во 88 минута наместо стрелецот на третиот гол за неговата екипа.
Лига на шампиони
Група А
Манчестер јунајтед – Базел 3:0
Фелаини 35′, Лукаку 53′, Рашфорд 84′
Бенфика – ЦСКА Москва 1:2
Сеферовиќ 50′ – Витињо 63′ (п), Жамалетдинов 71′
Група Б
Баерн Минхен – Андерлехт 3:0
Левандовски 12′ (п), Алкантара 65′, Кимих 90′
Селтик – ПСЖ 0:5
Нејмар 19′, Мбапе 34′, Кавани 40′ (п), 85′, Лустиг (автогол) 83′
Група Ц
Рома – Атлетико Мадрид 0:0
Челзи – Карабаг 6:0
Педро 5′, Запакоста 30′, Азпиликуета 53′, Бакајоко 71′, Бачуаи 76′, Медведев (автогол) 82′
Група Д
Барселона – Јувентус 3:0
Меси 45′, 69′, Ракитиќ 56′
Олимпијакос – Спортинг Лисабон 2:3
Пардо 89′, 90’+3′ – Думбија 2′, Мартинс 13′, Фернандеш 43′