Во најновиот извештај на ОН се вели дека расте бројот на гладни во светот и дека моментно, без храна се 815 милиони луѓе, што е 11 отсто од светската популација.
Во споредба со лани, тоа е зголемување за 38 милиони и според ОН ова е прво вакво зголемување по една деценија.
Од 815 милиони гладни, 98 отсто од нив живеат во држави во развој. Секој ден поради глад или неухранетост умираат околу 20.000 луѓе. На тоа влијаат судирите во светот, но и климатските промени.
Врз основа на извештајот на Светската програма за храна, Меѓународниот фонд за развој на земјоделието, Уницеф и СЗО, е нагласено дека до 2030 година гладта нема да биде искоренета.
Најмногу гладни има во североисточна Нигерија, јужен Судан и Јемен. Во Сомалија за 80 отсто од жителите има недостиг од храна, во ДР Конго седум милиони се соочуваат со глад проади пораст на насилствата и раселување.
На другата страна, во светот има доволно храна за сите, но годишно се фрлаат 1,3 милијарди тони храна. Само во САД годишно се фрлаат 220 милиони тони храна вредна околу 50 милијарди долари.